Exo 15 | NdeIBE | STEP | Ngakho uMosi labako-Israyeli basebehlabelela leli ihubo kuJehova: “Ngizamhlabelela uJehova ngokuba uphakeme kakhulu. Uphosele olwandle ibhiza lomgadi walo.

Exodus 15

Ingoma kaMosi loMiriyamu

1 Ngakho uMosi labako-Israyeli basebehlabelela leli ihubo kuJehova: “Ngizamhlabelela uJehova ngokuba uphakeme kakhulu. Uphosele olwandle ibhiza lomgadi walo.

2 UJehova ungamandla ami lehubo lami; Useyikusindiswa kwami, UnguNkulunkulu wami, ngizamdumisa; UNkulunkulu kababa ngizamphakamisa.

3 UJehova ulibutho; nguJehova igama lakhe.

4 Izinkolo zikaFaro lempi yakhe ukuphosele olwandle. Izikhulu zikaFaro ezithenjiweyo, zigalule oLwandle oluBomvu.

5 Inziki yamanzi ibagubuzele; batshona ekujuleni njengelitshe.

6 “Isandla sakho sokunene, O Jehova, saba lamandla obukhosi. Isandla sakho sokunene, O Jehova, sasihlikiza isitha.

7 Ebukhulwini bobukhosi bakho wabasakazela phansi abakuphikisayo. Wathukulula ulaka lwakho oluvuthayo, Lwabahangula njengezincwathi.

8 Ngokufutha kwamakhala akho amanzi aqoqana aba yinqwaba. Amanzi azikileyo ajiya phakathi kolwandle.

9 “Isitha sakloloda sathi, ‘Ngizaxhumana labo, ngizabafica. Ngizakwaba okuthunjiweyo; Ngizazitika ngokungokwabo. Ngizakhokha inkemba yami, isandla sami sibabhubhise.’

10 Kodwa wena waphephetha ngomoya wakho ulwandle lwabasibekela. Basabalala njengomnusu emanzini esabekayo.

11 “Ngubani kubonkulunkulu bonke onjengawe, O Jehova?” Ngubani onjengawe – olobukhosi ebungcweleni bakhe owesabekayo enkazimulweni yakho, owenza izimangaliso?

12 Welula isandla sakho sokunene umhlabathi wabaginya.

13 “Ngothando lwakho olungapheliyo uzabahola abantu abahlengiweyo. Ngamandla akho uzabaholela emzini wakho ongcwele.

14 Izizwe zizakuzwa zithuthumele; umhedehede ubahlukuluze abantu baseFilistiya.

15 Izinduna zase-Edomi zizatshaywa luvalo, abakhokheli baseMowabi bafikelwe yikwesaba, abantu baseKhenani banyamalale nya!

16 Ukwesaba lokuthuthumela kuzabehlela. Ngamandla engalo yakho, bazathula njengelitshe, Abantu bakho baze bedlule, O Jehova.

17 Uzabangenisa ubagxumeke entabeni yelifa lakho – indawo, O Jehova, owayenzela ukuthi uhlale kuyo, indawo engcwele, O Jehova, eyamiswa ngezandla zakho.

18 UJehova uzabusa kuze kube nini lanini.”

19 Kwathi lapho amabhiza kaFaro, izinkolo kanye labagadi bamabhiza sebengenile elwandle, uJehova wawabuyisa amanzi alo phezu kwabo, kodwa aba-Israyeli bona bazihambela badabula ulwandle phezu komhlabathi owomileyo. 20 Khonapho uMiriyamu umphrofethikazi, udadewabo ka-Aroni, wathatha isigubhu sakhe ngesandla, bamlandela bonke abesifazana bephethe amagedla begida.

21 UMiriyamu wabahlabelela wathi: “Mhlabeleleni uJehova ngokuba uphakeme kakhulu. Ibhiza lomgadi walo ukuphosele elwandle.”

Amanzi ababayo aseMara le-Elimi

22 UMosi wasebahola aba-Israyeli basuka eLwandle Olubomvu baya eNkangala bengatholi manzi. 23 Kwathi befika eMara behluleka ukunatha amanzi akhona ngokuba ayebaba. (Yikho indawo leyo kuthiwa yiMara.)

24 Ngakho abantu basebekhonona kuMosi besithi, “Sinatheni-ke manje?”

25 UMosi wasekhala kuJehova, uJehova wasemtshengisa isigojwana. Wasiphosela emanzini, amanzi aphenduka aba mnandi. Khonapho uJehova wabenzela isimiso lomthetho, njalo khonapho wabalinga.

26 Wathi, “Uma lilalela kakuhle ilizwi likaJehova uNkulunkulu wenu, lenze okulungileyo kuye, lilandele imilayo yakhe njalo ligcine lezimemezelo zakhe, kangisoze ngilehlisele iziga lezo engazehlisela amaGibhithe; ngoba nginguJehova olisilisayo.”

27 Basebefika e-Elimi lapho okwakulemithombo yamanzi elitshumi lambili khona, lezihlahla zelala ezingamatshumi ayisikhombisa. Basebemisa khona lapho eduze kwamanzi.